mer händ än teil vom wuchenänd z zermatt verbracht.

am friitig simmer mitere seilbahn ufs chline matterhorn ufegfahre, uf 3880 meter über em meeresspiegel. es isch än grossartige trip xi! leider hämmer nöd so vill glück mit em wetter gha, und vonere gwüsse höchi a simmer vo wulche umgää xi. verusse hät s au e-n-art vo schneeschturm gää, drum isch verusse umelaufe nöd so cool xi.

(mer sind nöd uf d spitze ufegloffe; wil ohni schiimaske isch es nöd sehr luschtig dur horizontaal flügende schnee zlaufe…)

defür simmer dur än belüüchtete gletscher gloffe:

da sind äs paar föteli vo de rückfahrt:

endlich hät mer öppis chöne xee, au wemmer vom matterhorn nüt xee hät. aber immerhin hämmer am zweite taag äs bitz dävo xee. es hät immer no wulche gha (und s chline matterhorn isch immer i dä wulche xi), aber dänn simmer uf de gornergrat uf ca. 3100 meter über em meeresspiegel gfahre. deet obe hämmer ächt en supper uusblick gha!

später, ufm zruggwäg, simmer nöd die direkti ruute via visp und züri gfahre, sondern em glacier-express naa mit dä matterhorn-gotthard-bahn vo visp uf göschenen via andermatt, und vo deet simmer dänn hei gfahre. die letschte beide föteli sind vo dem teil.

am sunntig hämmer äs rächt langs und intensiivs gwitter gha. all paar sekunde häts blitzt, und wo s gwitter bii ois aacho isch, hämmer d ganzi ziit s grummle vom dunner ghört. wos no ufm wäg zu ois xi isch hani probiert, äs paar föteli zmache – was rächt schwäär xi isch, wil blitz und abdrucke im gnau richtigä moment nöd so guet korrelieret. vo dä hundertä vo föteli wo-n-i gmacht han sind nur äs paar schön xi. une xender drüü devo, wo-n-i dä kontrast äs biz verstärkt han.

vor zwei wuche simmer mit em bernina-express-panoramazug vo chur uf tirano gfahre, und nachher mit em bernina-express-bus uf lugano.

de aafang, vo chur uf st. moritz, isch ähnlich wie de teil vo de glacier-express-zugfahrt (wo z zermatt startet): de albula-linie na und dänn de bernina-linie über dä bernina-pass uf italie, uf dä höchi vo bis zu 2253 meter über em meeresspiegel.

mer händ glück gha und s wetter isch (widr emal) sehr guet xi – wil am tag vorher, wommer eigetlich händ wele reise und mer ekai reservation überchoo händ, häts wie verruckt grägnet. d panorama-wäge sind widr emal schön xi, aber dur d feischter z fötele isch immer nonig so eifach wäge de reflexione. aber hey, mir sind da xi zum d uussicht z gnüsse und nöd zum fötele. (das machet mer äs anders mal. s hät s paar schöni stelle deet usse, zum biispil de morteratsch-gletscher womer usm zug äs biz händ chönne aaluege.)

äniwei, dä zweiti hauptteil vom uusflug, dä express-bus vo tirano uf lugano, isch nöd ganz so guet xi wie mer ghofft händ – ich fühl mi im ene bus immer wie inere sardiinebüchs und froi mi ufs uusstiige :-). d uussicht isch guet xi, abr s nächschti mal nämed mer dä zug zrugg.

letscht nacht häts widr gschneit. also hämmer hüt, nachdemmer schnee gschuuflet händ, en schneemaa boue. oisi büsi händ au dä plausch gha:

dä letschti schnee isch scho lang widr weg. abr vorere wuche häts widr aagfange z schneie. am letschte sunntig hämmer än spaziergang vo hadlike uf hiwil gmacht. s wetter isch sehr schöön xi!

grad, wo mer dihei xi sind, ischs äs biz anders worde: dä himmel isch grau worde. nachdem mer äs biz dä schnee vode stäge gruumet händ, simmer zu oisne büsi i d wärmi zrugg:

kurz nach dä wienacht häts plötzlich aagfange i dä schwiiz zschneie. womer vo lappland zrugg cho sind, hämmer vill schnee chöne gnüsse!

mer sind nöd die einzige xi wo-n-en gnosse händ: au d büsi händ de plausch gha. zumindescht die junge. äs paar vo ine sind direkt in tüüfe schnee ggumpet zum en schneeball zfange! (sorry, vo däm hämmer ekai föteli…)

leider isch dä schnee bald druff widr geschmulze…