nachdem mer de gotthard-basis-tunnel bsuecht händ simmer witer uf bellinzona gfahre, zum dä rescht vom tag z gnüsse. im tessin isches sunnig xi, ganz im gägesatz zum näbel nördlich vom gotthard! mer händ s castelgrande bsuecht, d altstadt erkundet und ä heissi dickflüssigi schoggi trunke und än marronichueche ggässe.

am friitig simmer mitem spezialzug gottardino dur dä neui gotthard-basis-tunnel gfahre, wo mir d möglichkeit ghaa händ teil vo dä sedrun-nothaltistell aazluege.

zerscht simmer mit äm schiff vo luzärn uf flüele gfahre. s wätter i dä tüütschschwiiz isch nöd dä hammer xi, abr mer händ äs paar cooli tüüfi wulche xe.

z flüele simmer in gottardino iigstige, wo ois in tunnel zu dä sedrun-station gfahre hät. bi dä station häts ä mängi info-material gha und än film übr dä basistunnel. äs isch um di driisg grad warm xi, und mitemene tiishi sehr aagnehm xi.

nach 45 minute zwüschehalt simmer dänn mitem zug zum süduusgang vom tunnel gfahre und händ z biasca ghalte, wo mer mit s paar souvenirs usm zug uusgstige sind:

au das jahr simmer z oslo xi. mer händ glück gha, s wätter isch echt super xi! mer händ di ganzi ziit sunne gha, es isch würkli schön xi.

mer händ äs paar uusflüüg gmacht, nämli uf ulvøya im süd-oschte vo oslo, …

… uf nesoddtangen, …

… und zum norsk folkemuseum uf bygdøy.

zletscht gits äs paar föteli vo tjuvholmen i de nacht:

nach zwei jahr simmer widr emal im wunderschöne bergell xi. mir händ widr im hotel helvetia z vicosoprano übernachtet, wo i de schwiizer hälfti vom tal isch.

mer sind deet ide erschte wuche vo de “chäschtene-wuche” xi, wo de ässbare chäschtene gwidmet sind, wo überall im tal deet wachsed. mit uusnahm vom tag wo mer aacho sind und de erschti halbi tag isch s wätter echt guet xi!

mer händ sils psuecht und au chiavenna:

mer händ widr de chäschtene-wald z castasegna psuecht:

und mer sind än andere teil vom via panoramica gloffe, das mal vo soglio auf stampa abe:

auch das mal hämer wieder emal feini kulinarischi spezialitäte gnosse. insbesondere mehreri maalziite (wieder emal) im hotel corona, wo mer d chance gha händ d geisse z träffe wo d milch für dä wunderbari geissechääs gänd, wo än teil vo oisem lieblings-tomate-geissechääs-salat isch. au di verschiedene teigware und fleischgericht sind super xi. aniwai. wänns bergäll nöd so wiit weg wär vo da (5-6 stunde mitem öv, abhängig devo wie hüfig me umstiige wott) würded mer da mee annegaa. ;-)

das jahr simmer a de tüütsche nordseeküschtä xi. an oisem erschte tag simmer vonere drache-konventschän z schillig und äme feschte sturm begrüesst worde. d drache sind innegeholt worde wo dä sturm losgange-n-isch, und am nächschte tag hämmer sie widr chöne bewundere.

ei super sach vo de küschtä isch, dass es da nöd so heiss isch. es isch meischtens äs paar grad chüeler als im inland, und es hät mee wind, und so sind di heisse summertemperature vill besser z erträge.

mir händ norderney psuächt, ä wattwanderig vo de küschtä uf baltrum gmacht (ufm meeresgrund wandere – wie kuul ischn das?), händ überhaupt s wattemeer gnosse, und au d seehundschtazion z norddeich psuächt. natürli hammer auch eifach die tolli szenerie gnosse, wie spaziere am strand bi tag und nacht.

das isch definitiv n ort wommer widr emal zrugg wänd.

vor äs paar wuche simmer ufs stanserhorn ufe, wo mer mit de “cabrio” seilbahn ufe sind. dobe isch s wätter viel besser uuszhalte xi als z züri (wos über 30 grad gha hät), au wenn es dobe nöd ganz so schöön xi isch – es hät sogar es biz grägnet. später simmer mit em schiff vo hergiswil zrugg uf luzern gfahre.

mer händ än teil vom wuchenänd z zermatt verbracht.

am friitig simmer mitere seilbahn ufs chline matterhorn ufegfahre, uf 3880 meter über em meeresspiegel. es isch än grossartige trip xi! leider hämmer nöd so vill glück mit em wetter gha, und vonere gwüsse höchi a simmer vo wulche umgää xi. verusse hät s au e-n-art vo schneeschturm gää, drum isch verusse umelaufe nöd so cool xi.

(mer sind nöd uf d spitze ufegloffe; wil ohni schiimaske isch es nöd sehr luschtig dur horizontaal flügende schnee zlaufe…)

defür simmer dur än belüüchtete gletscher gloffe:

da sind äs paar föteli vo de rückfahrt:

endlich hät mer öppis chöne xee, au wemmer vom matterhorn nüt xee hät. aber immerhin hämmer am zweite taag äs bitz dävo xee. es hät immer no wulche gha (und s chline matterhorn isch immer i dä wulche xi), aber dänn simmer uf de gornergrat uf ca. 3100 meter über em meeresspiegel gfahre. deet obe hämmer ächt en supper uusblick gha!

später, ufm zruggwäg, simmer nöd die direkti ruute via visp und züri gfahre, sondern em glacier-express naa mit dä matterhorn-gotthard-bahn vo visp uf göschenen via andermatt, und vo deet simmer dänn hei gfahre. die letschte beide föteli sind vo dem teil.

vor zwei wuche simmer mit em bernina-express-panoramazug vo chur uf tirano gfahre, und nachher mit em bernina-express-bus uf lugano.

de aafang, vo chur uf st. moritz, isch ähnlich wie de teil vo de glacier-express-zugfahrt (wo z zermatt startet): de albula-linie na und dänn de bernina-linie über dä bernina-pass uf italie, uf dä höchi vo bis zu 2253 meter über em meeresspiegel.

mer händ glück gha und s wetter isch (widr emal) sehr guet xi – wil am tag vorher, wommer eigetlich händ wele reise und mer ekai reservation überchoo händ, häts wie verruckt grägnet. d panorama-wäge sind widr emal schön xi, aber dur d feischter z fötele isch immer nonig so eifach wäge de reflexione. aber hey, mir sind da xi zum d uussicht z gnüsse und nöd zum fötele. (das machet mer äs anders mal. s hät s paar schöni stelle deet usse, zum biispil de morteratsch-gletscher womer usm zug äs biz händ chönne aaluege.)

äniwei, dä zweiti hauptteil vom uusflug, dä express-bus vo tirano uf lugano, isch nöd ganz so guet xi wie mer ghofft händ – ich fühl mi im ene bus immer wie inere sardiinebüchs und froi mi ufs uusstiige :-). d uussicht isch guet xi, abr s nächschti mal nämed mer dä zug zrugg.

vor äs paar wuche simmer z oslo xi. widr emal. s wetter isch erschtuunlich guet xi, mer händ vill sune gha, aber es isch nöd sehr heiss xi.

mer händ ziit i dä stadt verbracht…

… sind insle-hopping go mache, sind debii sowohl uf dä lindøya wie au uf dä hovedøya go schpaziire, und händ au s chlooschter uf dä hovedøya aaglueget, …

… sind im norwegische marine-museum uf bygdøy xi, …

… händ dä sognsvann psuecht, …

… und sind am schluss dä botanischi garte tøyenhagen go aaluege.